Праца ў сталярнай майстэрні ••• Нягледзячы на вакацыі, праца ў школьнай сталярнай майстэрні працягваецца. Зараз у вучняў старэйшых класаў прафесійная практыка. Вучні пад кіраўніцтвам майстроў вытворчага навучання Аднарогага А.В. і Кіслякова А.А. вырабляюць табурэты, лаўкі і іншыя гаспадарчыя рэчы для ўласных патрэб, пад заказ і на продаж. Неабходна абнавіць асарцімент драўляных вырабаў для ўдзелу ўвосеньскіх кірмашах. ••• •••Вырабы сталярнай майстэрні нашай школы-інтэрната зроблены з натуральнай драўніны, якасна і карыстаюцца попытам у жыхароў раёна і вобласці. А хлапчукі, калі працуюць у школьнай майстэрні, вучацца працаваць з рознымі інструментамі, апрацоўваць драўніну, і рабіць з яе патрэбныя ў быту рэчы. Гарачая пара ў швейнай майстэрні •••З самага пачатку летніх канікул у школьнай швейнай майстэрні “горача”, але не ад летняй спёкі, а ад напружанай працы. Вучаніцы шыюць вырабы для кухні: абрусы, сурвэткі, пасцельную бялізну. Над новай калекцыяй сувенірных лялек дзяўчынкі працуюць пад кіраўніцтвам майстроў вытворчага навучання Івашкі В.А. і Кіцько М.А. Канікулы ў разгары •••Падчас летніх канікул дзеці Сенненскай школы-інтэрната не толькі працуюць, але і адпачываюць. Актыўна ўдзельнічаюць у спартыўных спаборніцтвах па міні-футболе, валейболе і настольным тэнісе. •••Кожны тыдзень адбываюцца сяброўскія сустрэчы з групамі валанцёраў, падчас якіх праходзяць забаўляльныя мерапрыемствы: скокі на батуце, спаборніцтвы па бадмінтону, міні-футболу, дарц, лазертаг. Малодшыя школьнікі займаліся лепкай, арыгамі, пляценнем браслетаў з бісера. •••С пачатку чэрвеня выхаванцы цэлых два тыдня, разам з валанцёрамі дабрачыннай місіі “Рука ў руцэ”, займаліся музыкай і спевамі, вучыліся іграць на гітары, вывучалі англійскую мову. •••Кожную нядзелю ладзяцца экскурсіі, паходы выхаднога дня. Плануюцца аглядныя экскурсіі у г. Віцебск і г.Мінск. Працоўныя будні выхаванцаў школы-інтэрната •••Жыццё школы-інтэрната ахоплівае розныя накірункі працоўнай дзейнасці дзяцей і дарослых. З пачаткам летніх канікул работы прыбавілася. Выхаванцы прыбіраюць школьную тэрыторыю, красяць агароджу, даглядаюць за клумбамі, стрыгуць кусты. Школьныя палеткі з пасадкамі цыбулі, морквы, капусты і буракоў таксама патрабуюць увагі. Кожны дзень вучні у парніках дапамагаюць даглядаць за пасадкамі агуркоў, таматаў і перцаў. Для асабістых патрэб школа ўтрымлівае двух коней і вучні старэйшых класаў дапамагаюць у нарыхтоўцы сена для іх. •••Сумесная праца на карысць школы дае станоўчыя вынікі. Дзеці разумеюць – трэба дапамагчы дарослым у вырошчванні гародніны, бо ўсё вырашчанае прыйдзе на школьны стол, для іх харчавання. Лішкі гародніны школа прадась на кірмашы, або здась дзяржаве. А на атрыманыя грошы будуць набыты дадаткова фрукты ці сокі. Матэрыял падрыхтавала загадчыца бібліятэкі К.У.Кручок. |
News for 2024
|